मेक इन इंडिया अर स्किल डेवलपमेंट कु सच चबोड़्या : भीष्म कुकरेती

       मेक इन इंडिया अर स्किल डेवलपमेंट कु सच 

                                  

                                                  चबोड़्या : भीष्म कुकरेती 

एक आम भारतीय कर्मिक -साब याद च आप डिप्टी मैनजर छा  अर मि एक पुर्जा छंट्याण वळ साधारण कर्मिक छौ।  अर तब आपन मि तैं निकाळ दे कि मीमा टेक्निकल डिप्लोमा नी च। 

फैक्ट्री मैनेजर -हाँ तब हम फैक्ट्री मा ISO 9000 लाण वळ छया तो हरेक काम का वास्ता स्किल्ड वर्कर चयेणा छा। जौंमा टेक्निकल डिप्लोमा नि छौ हमन ऊँ सब्युंक तैं छुट्टी कर दे जौंतैं टेक्निकल नॉलेज नि छौ। 

एक आम भारतीय कर्मिक -अब आप फैक्ट्री मैनेजर बण गेन अर मीन पुर्जा छंट्याणो डिप्लोमा बि हासिल कर याल।  अब त मि तैं फैक्ट्री मा ले ल्यावो। 

फैक्ट्री मैनेजर -भौत बढ़िया कार।  पर चूँकि हम अब 6 SIGMA सिद्धांतुं हिसाब से चलणा छंवां त हमन पुर्जा छंट्याणो वास्ता  रॉबट ले एन जखमा कर्मिकों जरूरत ही नि पड़दी।  हाँ हम तैं रोबॉट मेंटेनेन्स का वास्ता ट्रेंड टेक्नीशियन चयाणा छन।  यदि टीम रोबॉट मेंटेनेंस कु टेक्निकल डिप्लोमा ह्वो त तू आजि बिटेन ऐजा। 

एक आम भारतीय कर्मिक -ठीक च मि रोबॉट मेन्टेंनेंस कु डिप्लोमा लेक आंद 

फैक्ट्री मैनेजर -भौत बढ़िया तो त्वे तैं तुरंत नौकरी मिल जाली। 

                                        छै मैना बाद 

एक आम भारतीय कर्मिक - साब ! मि रोबॉट मेन्टेंनेंस कु डिप्लोमा लेक ऐ ग्यों।  अब मी तैं नौकरी दे द्यावो। 

फैक्ट्री मैनेजर -एक्सलेंट ! पर न्यूअर क्वालिटी टेक्नीक का तहत अब हमम ऑटोमेटिक कम्प्यूटर ऐ गेन जु ऑटोमेटिकली रोबोट की देख रेख करणा  रौंदन। हां यदि तू ऑटोमेटिक कम्प्यूटर चलै सकदी त आजी नौकरी पर ऐ जा। 

एक आम भारतीय कर्मिक -ठीक च मि ऑटोमेटिक कम्प्यूटर च्लानो ट्रेनिंग लेक आंदु। 

फैक्ट्री मैनेजर -हाँ त वैदिनी नौकरी पक्की। 

                                   छै मैना पैथर 

एक आम भारतीय कर्मिक -साब ! मीन ऑटोमेटिक कम्प्यूटर चलाण सीख आल। अब मि तैं नौकरी पर धौर द्यावो। 

फैक्ट्री मैनेजर -ओहो , ग्लोबल क्वालिटी का वास्ता हमन कम्प्यूटर चलाणो वास्ता सुपर कम्प्यूटर लगै ऐन।  यदि त्वै तैं सुपर कम्प्यूटर चलाण आंद हो तो ?

एक आम भारतीय कर्मिक -ठीक च मि सुपर कम्प्यूटर चलाण सीखिक आंदु। 

फैक्ट्री मैनेजर -बस तो तेरी नौकरी पक्की समझ !

                                     छै मैना उपरान्त 

एक आम भारतीय कर्मिक -सर ! नाउ आई एम सुपर कम्प्यूटर एक्सपर्ट !

फैक्ट्री मैनेजर -ओहो ! अब हमन सरा फैक्ट्री चीन शिफ्ट करी आल।  हम अब इंडिया मा कुछ बि निर्माण नि करदा।  अब हम इख मेड इन चाइना का माल अपण ब्रैंड का नाम पर बिचदा।  

एक आम भारतीय कर्मिक -तो म्यार स्किल डेवेलपमेंट कु क्या ह्वाल ?

फैक्ट्री मैनेजर -इंडियन स्किल अब चाइना मा काम आल।  तू चीनी भाषा सीखी ले अर चीन मा काम ढूंढ। 

एक आम भारतीय कर्मिक -ठीक च मि अब चीनी भाषा सिखदु अर उखी नौकरी खुज्यांदु। 

29/12/14 ,  Bhishma Kukreti , Mumbai India